Gen 24 | ZomZIV | STEP | Tu-in Abraham tekta in a kum lah tam mahmah ta-a, a hihna khempeuh TOPA in thupha pia hi.

Genesis 24

Isaac le Rebekah

1 Tu-in Abraham tekta in a kum lah tam mahmah ta-a, a hihna khempeuh TOPA in thupha pia hi. 2 Amah in a inn sunga nasem makaipa ^{▼▼24.2 Ahikeh a upa pen} a neih khempeuh ukpa kiangah, “Ka phei nuai-ah na khut koih in. 3 TOPA, vantung Pasian, leitung Pasian tawh kiciama, tu-a ka tenna gam mite lak Canaan mite tanute tawh ka tapa tengsak loin, 4 ahi hangin kei gamah pai-in keima mipihte tawh ka tapa Isaac na kitensak ding kong deih hi,” ci hi. ^b

5 A nasempa in, “A numei in hih gamah kei hong zui nuam kei leh bang ka cih ding hiam? Nong paikhiatna gamah na tapa ka paipih kik ding hiam?” ci-in dong hi. ^c

6 Abraham in, “Tua lai-ah ka tapa na paipih kik peuhmah loh ding thei in. 7 Ka pa’ inn sung le ka pianna leitang pana hong lakhia TOPA vantung Pasian in kei tungah tomlo-a hong thuciam: ‘Na suan-le-khakte ^{▼▼24.7 Ahikeh ci} tungah hih leitang ka pia ding hi,’ a ci pa in - tua lai pan ka tapa’ zi ding na ngah nadingin na mai-ah ama vansawltak a sawl ding hi. 8 A numei nang tawh hong ton nop kei leh kei tomlawhna panin nang na suakta hi. Ka tapa tua lai-ah na paipih peuhmah kei ding hi,” ci hi. 9 Tua ahi ciangin nasempa in a pu Abraham phei nuai-ah a khut koih-a, hih thu tawh kisai-in tomlo-in kiciam hi.

10 Tua khit ciangin nasempa in a pu kala-oh sawm kai-in a pu’ van hoih namkim tawh pai hi. Aram Naharaim ^{▼▼24.10 Tua pen Masopotamia sak nitumna} lamah kuankhia-a, Nahor khuapi lam zuan hi. ^f 11 Amah in khuanawl tuikhuk gei-ah a kala-ohte boksak hi; tua hun, nitak lam numeite tuitawi hun ahi hi. ^g

12 Tua ciangin thu ngena, “TOPA, ka pu Abraham’ Pasian aw, ka pu Abraham tungah na migitna lak inla, tuni-in ka ma hong tunsak zo in. 13 En in tuikhuk kiangah ka dinga hih khuapi mite’ tanute tui tawi dingin hong kuan uh hi. 14 Keimah in, ‘Tui ka dawn theih nadingin na tuibel hong ngasuk in,’ ka cih ciangin, ‘Dawn inla, na kala-oh zong tui kong buahsak ding hi,’ hong ci nungak nu - na nasempa Isaac zi dinga na teelsa hisak in. Hih tawh ka pu tunga na migitna na lah lam ka thei ding hi,” a ci hi. ^h

15 A thunget a khit ma-in a liangko-a tuibel puasa-in Rebekah va pai hi. Amah, Abraham’ sanggampa Nahor’ zi Milcah’ tapa Bethuel’ tanu ahi hi. 16 Tua nungak bit a melhoih mahmah hi; pasal peuhmah tawh a lumkhawm nai kei hi. Amah tuikhukah paisuk-a, a tuibel dimin pai to kik hi. ⁱ

17 Nasempa tuanu kiangah pai mengmenga, “Na bel-a tui tawm hong dawnsak ve,” ci hi.

18 Tuanu in, “Topa aw, dawn in,” ci-a, a khutah tuibel khiasuk pah in a dawnsak hi.

19 Tuanu in amah a dawnsak khit ciangin, “Na kala-ohte in zong tui a kham khit mateng tui ka va tawi ding hi,” ci hi. 20 Tua ciangin tuanu in a tuibel-a tui, kuangzawn sungah sung pak in, tui tawi beh dingin tuikhukah tai a, kala-ohte khempeuh kham ding tui dim hi. 21 Mipa kam khat zong pau loin, TOPA in a khualzinna a lawhcinsak nading hi hiam, hi lo hiam cih tuanu kiang mahmah ah vil gige hi.

22 Kala-ohte in tui a dawn khit uh ciangin mipa in beka ^{▼▼24.22 Tua pen ounce 1/5 bang (gram 5.5 bang)} khat a gik kham nakbah khat le shekel ^{▼▼24.22 Tua pen ounce 4 bang (gram 110 bang)} sawm a gik kham tau nih suahkhia hi. 23 Tua ciangin amah in, “Nang kua tanu na hia? Na pa’ inn ah zana ka giah nading uh inndei a om diam, nong hehpihna in hong gen in,” ci hi. ^l

24 Tuanu in ama kiangah, “Milcah in Nahor tawh a neih a tapa Bethuel’ tanu ka hi hi,” ci a, 25 “Buhtu le gan-an tampi le zana na giah nading uh inndei zong ka nei uh hi,” cih beh lai hi. ^m

26 Tua ciangin mipa kunin TOPA bia a, 27 “Ka pu tunga a migitna le a muanhuaina a kipelhsak lo ka pu Abraham’ Pasian, TOPA kiphat ta hen. Ka khualzinna lampi-ah TOPA in hong pi-a, ka pu’ mipihte’ inn hong tun hi,” a ci hi. ⁿ

28 Nungaknu tai-a hih thute a nu’ innkuanpihte kiangah gen hi. 29 Rebekah in Laban min nei sanggampa khat nei-a, amah tuikhuk-a mipa kiangah paipah hi. 30 Amah in, a sanggamnu nakbah le a ban-a taute mu-a, Rebekah tung pan mipa in ama tunga a gente a zak phetin mipa kiangah paipah a, amah tuikhuk kianga a kala-ohte tawh dinga om mu hi. 31 Amah in, “Nang, TOPA’ thupha ngah pa hong pai in; bang hanga hih khawnga ding na hi hiam? Inn le kala-ohte om nading mun ka bawlkhol khin hi,” ci hi. ^o

32 Tua ciangin mipa innah pai-a kala-ohte’ van a san uh hi. Kala-ohte adingin buhtu le gan-an, le amah le a mite khe sil nading tui kipia hi. 33 Tua ciangin a mai-ah an kilui a, ahi hangin amah in, “Ka gen ding teng ka gen khit matengin an ka ne kei ding hi,” ci hi. ^p

Laban in, “Tua ahileh hong gen in,” ci hi.

34 Tua ciangin amah in, “Kei, Abraham’ nasempa ka hi hi. 35 TOPA in ka pu, thupha a dimtakin pia-a, neih-le-lam a hau zo hi. Ama tungah tuuhon, bawnghon, kham le ngun, nasem pasalte, nasem numeite le kala-ohte le laate pia zo hi. 36 Ka pu’ zi Sarah in a ^{▼▼24.36 Ahikeh ama aa} tek nungpi in tapa khat nei a, ka pu in a neih khempeuh amah pia hi. 37 Ka pu in kei tomlo in hong kiciamsaka, ‘Amau leitanga ka tenna Canaan mite’ tanute ka tapa’ zi dingin na la peuhmah kei ding hi. 38 Ahi hangin ka pa innkuanpihte le ka behte kiangah va pai inla ka tapa’ zi ding va la in,’ hong ci hi.

39 “Tua ciangin ka pu kiangah, ‘A numei in kei hong zui nuam kei leh bang ka cih ding hiam?’ ka ci hi. ^r

40 “Amah in, ‘A thu ka man TOPA in a vansawltak sawlin keima behte le ka pa’ innkuan sung panin ka tapa zi ding zonga na khualzinna-ah nang hong lawhcingsak ding hi. 41 Ka behte kiangah na pai ciangin amaute in nang tuanu hong piak nop kei uh leh zong ka tomlawhna panin nang na peng hi - ka tomlawhna panin nang hong kipengsak ding hi,’ hong ci hi. ^s

42 “Tu ni-in tuikhuk ka tun ciangin, ‘TOPA ka pu Abraham’ Pasian aw, nong hehpihna-in ka khualzinna-a ka paina thu tungtang hong lawhcingsak in. 43 Tuikhuk kianga ka din hong mu inla, nungak khatpeuh tui tawi dingin hong pai a ken, ‘Nong hehpihna in na tuibel-a tui tawmkha hong dawnsak ve,’ ka cih ciangin 44 amah in, ‘Dawn in, na kala-ohte ading zong tui ka tawi ding hi,’ hong cih leh tua pen ka pu’ tapa’ zi dinga TOPA telsa hisak in,’ ka ci hi.

45 “Ka lungsim-a ka thunget ka man ma-in, a liangko-a tuibel pua sa in Rebekah hong paikhia hi. Amah tuikhukah paisukin tui va dima, ama kiangah, ‘Nong hehpihna in tui hong dawnsak ve,’ ka ci hi. ^t

46 “Amah in a liangko pana tuibel lakhiasuk pah a, ‘Dawn in, na kala-ohte zong tui kong buahsak ding hi,’ hong ci hi. Tua ciangin ka dawna, amah in kala-ohte zong tui buak hi. ^u

47 “‘Kua tanu na hiam?’ ci-in ka dong hi. ^v

“Amah in, ‘Nahor in Milcah tawh a neih a tapa Bethuel’ tanu ka hi hi,’ hong ci hi. ^w

“Tua ciangin a nakah nakbah ka batsaka, a khutdawhah tau bunsak in, 48 ka kunsuk a TOPA ka bia hi. A tapa adingin ka pu’ sanggampa’ tunu ka ngah nadingin lampi mana hong pi TOPA ka pu Abraham’ Pasian ka phat hi. 49 Tu-in ka kihei nading ka theih nadingin ka pu tunga na migitna uh le na muanhuaina uh na lah ding uh leh hong gen un; na lah kei ding uh leh zong hong gen un,” ci hi.

50 Laban le Bethuel in, “Hih in TOPA kiang pan ahi hi; na tungah lam dang khat beek kong gen thei kei ding uh hi. 51 Hiah Rebekah om hi; amah tonpih inla TOPA hong laksa bangin na pu’ tapa’ zi hisak in,” ci-in dawng uh hi. ^x

52 Abraham nasempa in a thugen uh a zak ciangin TOPA mai lei lamah a kunsuk hi. 53 Tua ciangin nasempa in kham le ngun kizepna le puankhui-sate Rebekah pia hi; a sanggampa le a nu zong a manpha letsong pia hi. 54 Tua ciangin amah le amah tawh a omkhawmte in ne in dawn uh a tua lai-ah tam uh hi. ^y

A zingciang zingsang a thawh uh ciangin, “Ka pu kiangah hong ciahsak ta un,” ci hi. ^z

55 Ahi hangin a sanggampa le a nu in, “A tawm pen ni sawm bang peuhmah nungaknu ko tawh hong omsak lai in; tua khit ciangin na ^{▼▼24.55 Ahikeh tua nu} pai thei hi,” ci-in dawng uh hi. ^ab

56 Ahi hangin amah in amaute kiangah, “Tu-in TOPA in ka khualzinna hong lamzangsak zo hi; kei hong kol-awksak kei un. Ka pu kiangah ka pai theih nadingin hong ciahsak hoh un,” ci hi. ^ac

57 Tua ciangin amaute in, “Nungaknu samin amah i dong ding hi,” ci uh hi. ^ad 58 Tua ciangin Rebekah samin amah dong uh a, “Hih mipa tawh na pai ding hiam?” a ci uh hi.

Tuanu in, “Pai mah ning,” ci hi.

59 Tua ciangin amaute in a sanggamnu uh Rebekah a donnu le Abraham’ nasempa le a mite tawh tonsak uh hi. 60 Amaute in Rebekah thupha pia in ama tungah, ^ae

“Kote sanggamnu aw,
a tul tampi kisuangsawnin
khang inla,na suan-le-khakte in ^af
a galte uh kulhpite nei uh hen,” ci uh hi.

61 Tua ciangin Rebekah le a nasemnute kithawi uh a, kala-oh tungah tuangin mipa tawh pai uh hi. Tua ci-in nasempa in Rebekah tonpihin pai hi.

62 Tu-in Negev a, Isaac a ten laitak ahi manin amah Beer Lahai Roi pan hong pai hi. 63 Nitak khat thu ngaihsun ^{▼▼24.63 Hebrew ah hih kammal a cihnopna kician zo lo.} dingin lo lai-ah paikhia-a, a khuadak toh leh ama lam manawh a pai kala-ohte mu hi. 64 Rebekah zong khuadaka Isaac mu hi. Amah a kala-oh tung pan kumkhia-a, 65 nasempa kiangah “Hua lo lai-a eite hong dawnpa kua ahi hiam?” ci-in a dong hi.

Nasempa in, “Ka pu hi,” ci-in a dawng hi. Tua ciangin kikhuhna dial la-in kikhuh hi.

66 Tua ciangin nasempa in a hihsa khempeuh Isaac ko hi. 67 Isaac in a nu Sarah’ puanbukah tuanu paipih in Rebekah a tenpih hi. Tua ciangin amah a zi suaka, amah in tuanu a it hi; tuaci-in a nu sih khit ciangin Isaac kihehnem hi. ^ah